Përse hamë edhe kur nuk kemi uri?

Një studim i ri ka zbuluar se ekziston një lloj urie biologjikisht e ndryshme nga ajo që provojmë kur nuk kemi ngrënë..

Le të përpiqemi të kuptojmë diçka më shumë.

“ Ambroxho, nuk është tamam uri e imja, dua diçka të mirë”. Shumë prej jush e kujtojnë zonjën e famshme të një marke po aq të famshme çokollatash, e tunduar më shumë nga nepsi se sa nga uria. Por jo të gjithë e dini që në bazë të mekanizmit të përjetësuar në atë publicitet është një motiv shkencor: mënyra me të cilën organizmi ynë reagon ndaj ushqimeve që hapin oreksin, pavarësisht nga stimuli i urisë, ka ndryshuar nga momenti kur i është dhënë mundësia e shijimit të një ushqimi, edhe vetëm për kënaqësinë e të bërit dhe jo vetëm për t’u ushqyer.

Këtë evolucion të veçantë e ka studiuar një kërkues i Departamentit të psikiatrisë së Universitetit të Napolit, sipas të cilit : të kuptosh mekanizmat me të cilët organizmi i përgjigjet kësaj situate kaq të deformuar, është themelore për të përballuar epideminë e obezitetit të botës së zhvilluar. Rezultatet e arritura janë paraprake dhe duhen thelluar, por sugjerojnë drejtimin e duhur për të kuptuar për shembull, çfarë mbështet “nevojën për të shijuar një akullore më pana edhe pas mbarimit të një vakti shumë të pasur”.

Pra, nuk bëhet fjalë thjesht për mekanizmin e njohur tashmë, të ngrënies për neps dhe të mos mbajtjes së dietës: vihen në lëvizje dinamika shumë më të thella, të cilat krijojnë ndryshimin edhe nga ana biologjike. Gjatë eksperimentit është zbuluar që, në përmasa të barabarta, vakti me shije dhe ai pa shije krijojnë një ndryshim shumë të dukshëm përsa i përket aktivizimit të disa hormoneve dhe përcaktimit të disa substancave në gjak. Kështu krijohet një uri që paradoksalisht nuk vjen nga mungesa e ushqimit, por nga ajo që ofron ky ushqim.

Nëse nga njëra anë ky është një konfirmim i thjeshtë i faktit që ne jemi të programuar për të grumbulluar kalori dhe dhjamë, në mënyrë që t’i mbijetojmë urisë, nga ana tjetër, është një bazë shumë e mirë për të studjuar më thellë mekanizmat themelorë të obezitetit. /ikub/