Celesi i gjallerise eshte frymemarrja!

Në shoqëritë tona ku dominon jeta mendore, ne jemi mësuar të marrim frymë shkurt, në mënyrë të çrregullt apo edhe pak apo duke e mbajtur frymën. Për më tepër, ne marim frymë me gjoks, gjë që bën që ajri të hyjë në pjesën e sipërme të mushkërive dhe të dalë sërish nxitimthi. Furnizimi me oksigjen është i pamjaftueshëm e për rrjedhojë, gazi karbonik dhe toksinat mbeten të depozituara në indet e mushkërive.

Sipas specialistëve, ne duhet të përdorim diafragmën e cila, duke funksionuar si një piston natyral, ngjitet dhe zbret për të lënë të hyjë e të dalë ajri i mushkërive, duke bërë njëkohësisht një masazh të organeve të brëndshme pa asnjë sforcim.

Për çfarë shërben frymëmarrja?

Përveç faktit që frymëmarrja është funksioni i vetëm i trupit pa të cilin ne nuk mund të bëjmë më shumë se pak minuta, ajo përmbush një numër funksionesh: pasuron gjakun me oksigjen dhe e çliron nga mbetjet e gazrave. Ajo shërben gjithashtu për djegien e yndyrnave pa vlerë dhe për ekuilibrin e qëndrave nervore. Dhe, pra, kur frymëmarrja është e keqe, i gjithë organizmi ka probleme, gjë që shfaqet me lodhje dhe rënie të gjëndjes shpirtërore.

Le të shohim më poshtë se si mund të bëjmë gjimnastikën epërditshme të frymëmarrjes!

Frymëmarrja në momentin e zgjimit

Përpara pasqyrës, në momentin e larjes së dhëmbëve, përgatitemi për një ditë të shkëlqyer. Përkulni gjunjët dhe vendosni dy duart mbi kofshë. Filloni duke nxjerrë ajrin me shumë forcë nga goja, duke futur brënda barkun, sikur të donit ta afronit me kolonën. Pastaj, merrni frymë me hundë duke liruar muskujt e barkut dhe duke lënë që barku të rikthehet në pozicionin e tij fillestar. Përsëriteni nga 3 deri në 5 herë.

Në fund, ngrihuni përsëri, merrni frymë përsëri duke fryrë barkun, pastaj bllokoni ajrin për 5 deri në 10 sekonda për të rregulluar trupin.
Të mirat: Ju bëni një pastrim të vërtetë të mushkërive, rivini në funksionim diafragmën, i gjithë trupi rigjallërohet. Keni një ndjesi freskie.
Frymëmarrja në mjetet e transportit

Jeni të stresuar. Stop! Nuk ia vlen të trishtoheni. Atëherë, ç’duhet të bëni? Të merrni frymë!

Ulur ose në këmbë, nuk ka rëndësi. Rëndësi ka që të bëni një frymëmarrje të ngadaltë, duke kontrolluar ritmin e saj. Në fillim vini dorën në bark, për të ndjerë frymëmarrjen tuaj natyrale për 2 deri në 3 sekonda.

Filloni: merrni frymë me hundë për 4 sekonda, bëni një pushim prej 2 sekondash, pastaj nxirreni ajrin (gjithnjë me hundë) për 6 sekonda. Barku fryhet kur merrni frymë dhe shfryhet kur nxirrni ajrin. Përsëriteni 3 deri në 5 herë apo edhe më tepër, në rast se ju pëlqen.

Të mirat: duhet të keni një ndjesi relaksimi dhe qetësimi. Mëndja mbetet e gjallëruar. Përqëndrimi në frymëmarrje dhe ngadalësimi i saj veprojnë si një anti-stres natyror i vërtetë.

Frymëmarrja në zyrë

Mbasdite, në rast ngarkese të madhe apo rënieje të përqëndrimit, merrni frymë! Ulur, me shpinën drejt mbështetur në kolltuk, nëse është e mundur. Përndryshe, qëndroni përpara me shpinën drejt. Vendosini duart në anë të tavolinës.
Filloni: nxirrni ajrin nga goja për 4 sekonda, duke i shtyrë duar përpara dhe duke futur brënda barkun. Përkulni shpinën, në mënyrë të tillë që të mund të vështroni pjesën e kërthizës. Pastaj merrni frymë për 4 sekonda. Drejtoni përsëri trupin. Përsëriteni 4 ose 5 herë.

Të mirat: truri ushqehet me oksigjen dhe trupi relaksohet. E shkëlqyer për të rigjallëruar trupin, sikur të bënit një pushim të shkurtër.

Frymëmarrja në mbrëmje

Shtrirë në shpinë, përpara se t’ju zërë gjumi, përgatituni për të rënë në gjumë.
Filloni: në fillim, nxirrni ajrin thellë nga hunda. Me barkun të futur, lombaret mbeten të palëvizshme nga shtrati. Pastaj, merrni frymë duke e çliruar përsëri barkun. Pa e shkëputur pjesën e poshtme të shpinës, pa sforcim, lëreni lëvizjen të bëhet natyrshëm.

Një këshillë: i vini rëndësi më të madhe nxjerrjes së ajrit si një faktor i relaksit. Kjo gjë krijon relaksim dhe ju bën të ndjeni qetësimin e fytyrës, çlirim të nofullave dhe rënie të shpatullave. Kur merrni frymë, vlerësoni ajrin që hyn në anët e flegrave të hundës./living/